තවත් දවසක... (පස්වැනි දිගහැරුම)

සිතේ නළියන වේදනාව සිත තුළම පොදි කරගෙන සුපුරුදු ලෙසින් රාජකාරියට වාර්තා කළෙමි. සැබෑවටම මා සේවයට වාර්තා කළ යුතු වූයේ උදෑසන 8.30 ට පෙර වුවත්, පුරුද්දක් වශයෙන් නිතිපතා උදෑසන 7.30 ත් 7.45 ත් අතරතුර සේවයට වාර්තා කිරීම මගේ සිරිත විය. පැමිණීම සටහන් කොට මගේ අසුනට බර වුනෙමි. කාර්යාලයේ වීදුරු බිත්ති විනිවිද අහම්බෙන් මෙන් ඇගේ රුව ම නෙත ගැටිණ. සිත අතීතයට ඇදී ගියේ මටද නොදැනීමය.. එහෙත් හැඟීම්වලට ඉඩදී බලා සිටිය නොහේ.. මන්ද යත් රාජකාරීය දේවකාරියටත් වඩා උතුම් දෙයක් වන බැවිනි.. අනෙක් අතට වැඩක නිරත වන විට සිත ඔද්දල් කරන මතකයන් කිසිවක් සිතට පිවිසෙන්නට පොරකන්නේද නැත. හෙට ඉඳන් තව ටිකක් පරක්කුවෙල එන්න ඕන... මසිතට තදින් අවවාද කර ගතිමි. කොහොමටත් ඈ කෙරෙහි මසිතේ ජනිත වු හැඟීමි කිසිවක් හෝ මරා දැමීමට මම අපොහොසත් වීමී.. එහෙත් කාලයට ඉඩදී බලා හිඳිනවා හැරෙන්නට... කළ හැකි අන් කිසිවක් මට සිතා ගත හැකි නොවේ....


* * * * * * * * * * * * * * * * * * * * * * * * *

වේලාව උදෑසන 10.45 ට පමණ ඇත. අත්‍යාවශය ලිපිගොනු කිහිපයකට අත්සන් ලබා ගැනීම සඳහා මම කළමනාකරුගේ කුටියට ඇතුලු වූයෙමි. මා සිටියේ කළමනාකරුට මුහුණලා සිටගෙනය. ගත වූයේ සුළු මොහොතකි..
කුටියේ දොරට තට්ටු කරන හඬක් ඇසුණෙන් මගේ දෙනෙත් එදෙසට යොමු වූයේ නිතැතිනි.
“ Excuse me Sir...” යැයි කියාගෙන ගනුදෙනුකරුවෙක් එහි ඇතුලු විය.. මට ඒ මුහුණ තරමක් හුරු පුරුදුය.. සිහින් සිනහවකින් ඔහුට සංග්‍රහ කළෙමි. මා සමඟ සිනහසෙන්නට හෝ වෑයම් නොකළ ඔහු කළමනාකරු දෙස බලා සිටියේ කෙන්තිය පුපුරා හැලෙන දෑසිනි...

“ඇයි මහත්තයා....?” තමන් ඉදිරියේ වූ අසුනක් වෙත සුරත දිගු කරමින් කළමනාකරු විමසයි...

ඔහු වේගයෙන් පුටුවක් පසෙකට ඇද එහි හිඳ ගනියි...
“මහත්තයෝ අපි සල්ලි ගේන්නෙ බැංකුවට සල්ලි දාලා යන්න...
එහෙම නැතුව මේ ගේන සල්ලි දිග ඇර ඇර ඉන්න අපිට වේලාවක් නෑ...”

“ඇයි මහත්තයා මොකද වුණේ ?”

“මහත්තයො, මං බැංකුවත් එක්ක ගනුදෙනු කරන්නෙ ලක්ෂ ගණන් වලින්... මං ඒව නවල ගෙනාවත් දිග ඇරල ගෙනාවත් මහත්තයලට තියෙන්නෙ ඒවා භාරගන්න එක...” ඔහු දත්මිටි කයි...

“ඔව්.. ඔව්... මහත්තයා ඉතින් මොකද වුණේ...?”

“නෑ... මහත්තයෝ අද අර කවුන්ටරේ ඉන්න හාදයා.... මිනිහ නිකන් සල්ලි ටික ආපහු මගේ මූණට දමල ගහන්න වගේ කවුන්ටරේ උඩට අතෑරල කියනව.. ගේනව නම් සල්ලි ටික දිග ඇරල ගේන්න කියලා... මෙහෙමද මහත්තයො ගනුදෙනුකරුවන්ට සලකන්නෙ...”

මම එතැන හිඳගෙනම ඉදිරිපසින් වූ මුදල් අංශය වෙත නෙත් යොමු කළෙමි. මට කාරණය වැටහිණ.. ඔහු කියන කවුන්ටරයේ අද සිටින්නේ අප ශාඛාවේ නිත්‍ය සේවයේ නියුතු පුද්ගලයෙක් නොවේ. හදිසි නිවාඩු පිට සිටින අප සගයෙකු වෙනුවෙන් කලාපීය කාර්යාලයෙන් (Regional Office) එවූ අයෙකි. Re-leaf Duty සඳහා එන මෙවැනි පුද්ගලයන් අනුයුක්ත කොට ඇත්තේ වෙනමම Re-leaf Pool එකකටය.. ඔවුන් එතැනට වැටෙන්නෙ බොහෝවිට දඬුවම් වශයෙනි... කුමන හෝ වරදක් නිසා එහි සේවයට වැටෙන්නන් ඉන් පසුව බැංකුව ගැන නොසිතයි. ඔවුනගේ එකම අරමුණ පැමිණිම හා පිටවීම සටහන් කොට මාසය අවසානයේ පඩිය හා ලැබිය යුතු සියළුම දීමනා ටික ලබා ගැනීම පමණි... වරද කාගේ වුවද ඔවුනගෙ ක්‍රියාකළාපය නිසා බැංකුවේ කීර්තිනාමයට වන හානිය ඉමහත්ය..

මුදල් අංශයේ සේවයේ නියතු වන්නන් හට මුහුණදෙන්නට වන එක් ගැටළුකාරී තත්වයක් වන්නේ බොහෝ ගනුදෙනුකරුවන් විශාල මුදල් තැන්පතු ගෙන එන විට, විශේෂයෙන් විවිධ මුදල් නෝට්ටු වර්ග රැසකින් ඒවා ගෙන එන විට කිසිදු පිළිවෙලකින් තොරව ගෙන ඒමත්, ඒවා Folders වශයෙන් නවා ගෙන පැමිණීමත්ය. සාමානයයෙන් ගතහොත් පිළිගත් ක්‍රමය වන්නේ මුදල් නෝට්ටුවේ අගය අනුව මේවා වෙන්කොට ගෙන ඒමය.. එනම් 2000/- නෝට්ටු වෙනමත් 1000/- නෝට්ටු වෙනමත් යනාදී වශයෙනි. නිතර පැමිණෙන ගනුදෙනුකරුවන් බොහෝදෙනෙක් මේ ආකාරයට මුදල් ගෙන ඒමට තරමි කාරුණික වෙති. එය අපේත්, ඔවුන්ගේත් කාලය ඉතිරි කර ගැනීමකි. කවුන්ටරය ඉතා කාර්ය බහුල වන අවස්ථාවල එසේ ගෙන නොඑන මුදල් තැන්පතු නිසියාකාරයෙන් සකස් කරගැනීමට තැන්පත්කරුගේත් සහය ලබා ගැනීමට අපට සිදුවේ... එහෙත් එය ඔවුනට පවසන ආකාරය ඇතැම්විට ගැටළුකාරී තත්වයන් උදාකරයි.. ඔබ එය ඔවුනට පවසන විට ඔබේ හඬ පාලනය..., වාග් විලාශය මේ හැමදෙයක්ම ඒ කෙරෙහි බලපානු ලබයි. එය කිරීමෙන් තමන්ගේ තත්වයට හානීවේයැයි ගනුදෙනුකරු නොසිතන තැනට කටයුතු කිරීම මුදල් අංශයේ සේවය කරන අයගේ දක්ෂතාවය මත තීරණය වේ. අපේ කලාප කාර්යාලයෙන් එවු සගයා වුවමනාවෙන්ම හෝ නොසැලකිලිමත්කම නිසා ගනුදෙනුකරු එවැන්නක් කිරිම තම තත්වයට හානිවේයැයි සිතන තැනට ඇද දමා ඇත..

ඔබ ඊළඟ වතාවේ මුදල් තැන්පත් කිරීමට බැංකුවකට යනවානම්, තැන්පත් කිරීමට රැගෙන යන මුදල් නිසියාකාරයෙන් සකස්කරගෙන යෑමට තරම් කාරුණික වන්න.. ( අඩු වටිනාකමින් යුත් නෝට්ටු උඩටත් වටිනාකමින් වැඩි මුදල් නෝට්ටු යටටමත් සිටින සේ, එක් එක් අගයෙන් යුතු එකම වර්ගයේ නෝට්ටු එක ළඟ සිටින සේ සකසා ගන්න) එය ඔබේත්, ඔවුන්ගේත් කාලය ඉතිරි කරගැනීමටත්.. කවුන්ටරයේ තදබදය අඩු කිරීමටත් ඉවහල් වනවා නොඅනුමානය... ඒ සඳහා ඔබට විශේෂයෙන් යමක් හිමි නොවුනද ඔවුනගේ නොමද ස්තූතිය නම් ඔබට හිමිවන බවට මට සහතික විය හැකියි..

|සේයාරුව PicApp අඩවියෙනි|