ඉක්කයි මායි...

ඔව්.. ඔව්.. මේ කියන්න හදන්නෙත් අර ගාලු ගිය ඉක්කා ගැන කතාවක් තමයි ඕං...

අහල ඇතිනේ “ඉක්කයි මායි ගාලු ගියා... ඉක්ක දාලා මං ආවා” කියල...

දැන් ඉතින් ගහෙන් ගෙඩි එන්නා වගේ අහන්න එපා ඉක්කටයි ඔය උඩ ඉන්න දැරිවිටයි තියෙන සම්බන්ධෙ මොකක් ද කියල.. ඉස්සෙල්ල කතාව කියවල හිටියනං..

ඔය ගෙදරදි.. විශේෂයෙන් කෑම කන වෙලාවට එහෙම ඉක්ක ගහන්න ගත්තොත් එහෙම ඉවරම තමයි... ඇයි ඉතින් අපේ අම්මල වතුර පොවන ගමන් දේශනාව පටන් ගන්නව නෙව...
“අනේ මං දන්නැහැ මේ ළමයි වතුර ටිකක් බොන්නැහැ... වේළිල... වේළිල ඉඳල කන්න ගන්නවා...” කියල.. ඒත් ඉතින් ඔය අපිට හැදෙන ඉක්කාව වතුර ටිකක් බිව්වහම එහෙම හරියනවනෙ... හැබැයි මගේ එක යාලුවෙක් හිටියා... මිනිහගෙ ඉක්කාව වතුර බ්ව්වට නතර වෙන්නැති එකක්...

යාළුවගේ නම නිශාන්ත.. මිනිහගේ ඇත්ත නම ඒක වුණාට බැංකුවේ කවුරුවත් මෑන්ව ඒ නමින් දන්නෙ නැහැ... දැන් කියන්න එපා එහෙනම් දන්නවා ඇත්තෙ සර්නේම් එකෙන් වෙන්නැති කියල... මිනිහගේ සර්නේම් එකම තියෙන කට්ටිය තව ඇති දාහක් දෙදාහක් විතර...

"එයාට කවුරුත් කිව්වෙ ජිමී"... කියල (කව්ද බෝයි කියල නෙමෙයි ඕං...) අපි මුලින් හිතුවේ කවුරුහරි මිනිහට ගහපු කාඩ් එකක් කියල... මොන.. පස්සෙයි දැනගත්තෙ ඒ නම දාගෙන තියෙන්නෙ මෑන්මයි කියල... මිනිහ තමන්ගෙ ඇත්ත නමට වඩා මේ නමට මාර ආසයි... කොච්චර ආසද කිව්වොත් කවුරුහරි මිනිහගේ ඇත්ත නම කිව්වට මිනිහ නෙමෙයි ඇහැක් ඇරල බලන්නෙ... මිනිහ දාගත්ත නම ජිමී වුණාට අපි ඉතින් කතා කරන කොට හරි සංවර විදිහට කතා කරන හන්දා කතාකරන්නෙම "ජිමියා"... කියල. අහගෙන ඉන්න කෙනෙක් හිතයි බල්ලෙකුට කතා කරනවා කියල.. ඔන්න ඉතින් ජිමියත් අපිට එකතු වුණේ අපේ සුප්‍රසිද්ධ ශාඛාව විවෘත කරන කාලෙදිමයි... ඒ කියන්නේ මීට අවුරුදු දෙකකට විතර කලියෙන්... ඒ කාලේ ජිමියා හිටියේ කෑෂ් එකේ... මං හිටියේ ඔපරේෂන්ස් ඒරියා එකේ... මං කලිනුත් කියල තියෙනවනෙ... මට හොරා කූඹියෙකුටවත් බ්‍රාන්ච් එක ඇතුළට එන්න බැහැ කියල... මොකද මං ඉන්න තැනට බ්‍රාන්ච් එකට ඇතුල් වෙන හැම කෙනාවම හොඳට පේනවා... කෑෂ් එකේදි ඉතින් මිනිහෙක්ගේ පේන්නෙ පාස්පෝට් සයිස් [ ] විතරයිනෙ... (හෙණ ගහපන් ගණන් බලාපන් කිව්වලු... මිනිස්සුන්ගෙ විතරක් නම් මදැයි... ගැහැණුන්ගෙ වුනත් ඉතින් එච්චරයිනෙ.. ඒ හන්දා අපේ කට්ටිය ඉතින් ඉන්නේ මූණු හතරැස් කරගෙන.. ) හැබැයි ඔපරේෂන්ස් ඒරියා එකේ ඉන්න කොට ඒ අවාසිය නෑ... ආයේ ඉතින් ඉහේ සිට පාදාන්තය දක්වාම බැල්මට් එක දාතෑකි... ඒ හන්දා අපේ කෑෂ් එකේ අයියල ටික මාත් එක්ක හිටියෙ පුදුම ආදරේකින්... හප්පේ බලන්ඩ එපායෑ.. කොච්චර ආදරේකින්ද කිව්වොත් ඇහැට කනට පේන හොඳ ලස්සන කෙලි පොඩිත්තියක් එහෙම බ්‍රාන්ච් එකට ආවහම මුන්ගෙ වැඩේ මට දත නියවන එක...

කෑෂ් එකත් ඔපරේෂන්ස් ඒරියා එකත් වෙන වෙනම පිහිටල තිබුණත් මට ඉඳල හිටල ඒ පැත්තට යන්න වෙන අවස්ථා තියෙනවා.. ඉතින් ඒ මුල් කාලේ මං කෑෂ් එක පැත්තෙ යන සමහර දවස්වල ජිමියා ඉක්කා ගහන සද්දෙ මට තදින්ම ඇහිල තියෙනවා... ඉතින් මං කරන්නෙ අපේ පියන් ලව්වා හීන් සීරුවේ මිනිහට වතුර වීදුරුවක් යවන එක..

කොහොමහරි එක දවසක් මටයි ජිමියටයි ඔපරේෂන්ස් ඒරියා එකේ එකට වැඩ කරන්න සිද්ධ වුණා.. මම මැද කවුන්ටරේ... මිනිහ මට එහායින් දකුණු පැත්තෙ කවුන්ටරේ.. එදා එච්චර සෙනඟ නැති දවසක්... ඔන්න ටික වේලාවක් යද්දි දොර ඇරෙනව වගේ දැක්ක හන්දා මං ඔලුව උස්සල බැලුවා..... බිබිලි නගින බෙලිකටු... දෙදරන දඟර සුළං...! හරියට සුරංඟනාවියක් වගෙ ලස්සන කෙලි පොඩිත්තියක්.. අනේ පොෂ් වුණාට හරි දුප්පත් පාටයි... මට එහෙමයි හිතුණෙ... මොකද කාර් එකකින් බැස්සත් ඒ දැරිවි ඇඳල හිටියෙ චූට්ටන් කොට කලිසමකුයි ඇඟටම ඇලිච්චි ටී ෂර්ට් එකකුයි නෙව... එයා කෙලින්ම ගියේ කෑෂ් එක පැත්තට... මෙන්න බොලේ හිටි අඩියෙ මට ඉක්කා ගහන සද්දයක් ඇහෙනව... සද්දෙ ආවේ මගේ දකුණු පැත්තෙන්... මං හීන් සීරුවේ ඔලුව හරවල බැලුව... බොලේ ! අපේ ජිමියා එකසිය ගානට ඉක්කා ගහනවා... මං ඉතින් මිනිහට මගේ වතුර බෝතලේ දුන්නා... මොන... වතුර බිව්වට අඩුවෙන ඉක්කාවක් නෙවෙයි වගේ... මේකගේ ඉක්කාව හන්දා මට අර දැරිවිව එහෙම පිටින්ම අමතක වුණා නෙව... ආයෙ හැරිල බලත්දි මෙන්න ඒ දැරිවිගෙ ඡායාව වගේ එකක් ඉස්සරහ දොරෙන් පිටවෙල යනවා....

මට ජිමියා ගැන හිතුණේ පුදුම ආදරයක්! @#$%^#
(අපිටත් ඉතින් ඒ කාලේ කහ කිරිල්ලියෝ මුණ ගැහිල තිබ්බේ නැහැනෙ..)

පුදුමේ කියන්නෙ ඒ දැරිවි පිටවුණත් එක්කම වගේ ජිමියගෙ ඉක්කාවත් නතර වුණා...
පුදුමයි නේද? පස්සේ මේ ගැන සොයාබලන්න අපි විශේෂ කමිටුවකුත් පත් කළා... කමිටු වාර්තාව හරිම පුදුම එළවනසුළුයි...

ඉන් පස්සෙ මිනිහ ඉක්ක ගහ‍න සද්දයක් එහෙම ඇහුනොත්, වතුර බෝතලේ හොයනව වෙනුවට අපි මුලින්ම කරන්නෙ වටපිටාව සෝදිසි කරන එක....

මොකද අර කමිටු වාර්තාවේ හැටියට ඒ ඉක්කාව හැදෙන්නෙ ලස්සන කෙළි පොඩිත්තියන්ව දැක්කහම විතරයිලු....
ආරංචියෙ හැටියට නම් මුල් කාලේ අනෙක් අයට පුංචි සංඥාවක් විදිහට පටන් ගත්තු ජිමියගේ ඉක්කා ගැහිල්ල දැන් පුරුද්දකට ගිහිල්ලලු...

හැබැයි ඉතින් ඒ ඉක්කාව නම් ගාලු ගියත් දාලා එනව බොරු...

|සේයාරුව PicApp අඩවියෙනි|