ස්පයික් ස්පයික් බේබි..| Spike Spike Baby...

ඔය ඇහැට කනට පේන දැරිවියෝ හන්දා අපේ හාදයන්ට වෙලා තියෙන සන්තෑසිවල නිමක් නෑ..... ඕං අද කතන්දරයත් ඒ වගේ අලකලංචියක් ගැන තමා...

මේක සිද්ධවුණේ මං ඉස්සර කිරිබත්ගොඩ වැඩ කරන කාලේ... ඒ මං කිරිබත්ගොඩ කෑෂ් එකේ වැඩ කරන කාලේ... ඒ කාලේ අපේ කෑෂ් කවුන්ටර්ස් පහක් තිබුණා... මං හිටියෙ පළවෙනි කවුන්ටරේ.... මට වම් පැත්තෙන් දෙවැනි කවුන්ටරේ හිටියේ මගේ අතිජාත මිත්‍රයා “දෙනෙත්” හොඳ උඩරට වළව්කාරයෙක්.... හිහ් මිනිහ ගැනත් කියන්න මරු කතාවක් තියෙනවා... ඒක පස්සෙ දවසක කියන්නංකො... අද කතාව මිනිහ ගැන නෙවෙයි... අපේ වෙනින් හාදයෙක් ගැන.... මේ හාදය හිටියේ පස්වැනි කවුන්ටරේ... කවුන්ටර පහක් තිබුණට මොකද හැම දාම කවුන්ටර පහම පිරෙන්න සෙනඟ... කවුන්ටරෙන් පටන් ගත්තහම ඇහැට පේන මානේම තියෙන්නෙ පෝළිම විතරයි... හප්පේ ඒ කාලේ මතක් වෙනකොටත් ඇඟේ මයිල් ස්මයිල් වෙනවා... සතිය ආරම්භයේදි වගේ ම අවසාන වන දවසටත් මේ තත්වය මෙහෙම වුණාට සතියෙ මැද දවස්වල තත්වය ටිකක් විතර හොඳයි... බොහොම සාමකාමීව කවුන්ටර පහෙන් ජාමේ බේරගන්න පුළුවනි... ඉතින් මට මතක හැටියට මේක වුණේ සතියෙ මැද දවසක... එදා එච්චර තදබදයක් තිබුණේ නැති දවසක්...

ඔය කෑෂ් කවුන්ටරේ වැඩ කරනකොට අපි හැමෝටම වෙනම කම්පීතරයක්, පාස් බුක් වැලිඩේටර් කියල හඳුන්වන ප්‍රින්ටරයක් වගේම වෙන වෙනම කෑෂ් ඩ්‍රෝවර් එහෙම ලැබෙනවා... කෑෂ් ඩ්‍රෝවර් එක කියන්නෙ ලාච්චු දෙකකින් සමන්විත පොඩි ලොකබල් කැබිනට් එකක්! දවස අවසාන වෙනකල් මුදල් තැන්පත් කරල තියන්නෙ ඕකේ තමයි... ඒ වගේම තමා අපේ වැඩ පහසු කරගන්න පාවිච්චි කරන තව තව ආම්පන්න තියෙනවා.... අපි පෝස්ට් කරන වවුචර් එහෙ මෙහෙ නොයන විදිහට රඳවන්න තියෙන භාණ්ඩෙට කියන්නේ ස්පයික් එක කියල... අහලත් ඇතිනේ... ස්පයික් එක කියන්නේ ලෝහ හරි ප්ලාස්ටික් හරි ආධාරකයක රඳවපු උල් ලෝහ කූරක්!

ගනුදෙනුවක් අවසානයේ අදාළ වචුචරය මේ ලෝහ කූරේ ගහල තියන එක තමා සාමාන්‍ය සිරිත... සැරෙන් සැරේ කෑෂ් ඔෆිසර් ඇවිත් මේ වවුචර් අරගෙන යනවා... මොකද වවුචර් කපන්නේ එයානේ.... දැන් ඉතිං අහන්න එපා වවුචර් කපන්නේ කතුරෙන්ද කියල.... වවුචර් කපනව කියන්නෙ දරුවනේ... ඒවා චෙක් කරන එකට... හරිද...?

ඉතින් ඔන්න එදා අපේ කතානායකයා ගජරාමෙට වැඩ... එච්චර සෙනඟක් නොහිටියත් හැමවෙලේම දෙතුන් දෙනෙක් පෝළිමේ... අපරාදේ කියන්න බෑ මේ හාදය ගිනිකසයා වගෙයි වවුචර් ගහන්නේ.. ඇස් දෙක පියාගෙන වුනත් වවුචර් පෝස්ටින් කරන්න පුළුවන් තරමේ එක්ස්පීරියන්ස් එකක් තියෙන පොරක්... මෑන් කොහොමත් දවසකට වවුචර් 300 කට වඩා ගහනවා.. ඉතින් ඔන්න ටික වෙලාවක් යද්දි මිනිහට යාන්තමට වගේ පෙනුණා තමන්ගෙ පෝළිමේ අන්තිම හරියට වෙන්ඩ, අර කිව්ව වගේ ඇහැට කනට පේන දැරිවියකගෙ ඡායාවක්! මේක දැක්ක විතරයි මෑන්ස් වවුචර් ගහන්න ගත්තේ නැතෑ ආවේශ වෙචිච් ගුරෙක් වගේ... මොකද ඔය වගේ දැරිවියක් කවුන්ටරේ ඉන්න කොට එක එක ජාතියේ ඉඟි බිඟි දාලා තමන්ගේ පෝළිමට ඇදල ගන්න තරම් දක්ෂ අයියල තමා ඒ කාලේ කෑෂ් එකේ හිටියේ.. දැන් ඉතින් අපේ හාදය වවුචර් ගහනවා හිටූ කියල... ඇයි අප්පේ අතට ආපු කිරිල්ලි වෙන එකෙක් ඇදල ගත්තොත් එහෙම...... පෝළිමත් බලාඉද්දිම කොට වෙනවා... අන්තිමේ කොහොමින් කොහොම හරි අර දැරිවිගේ වාරේ ආවා... ඔන්න එතකොට තමා අපේ එකාට නිදහසේ හුස්මක් ගන්න ලැබුණේ... එක දිගට වවුචර් ගහගෙන ගහගෙන ගෙහුන් මූට හතිත් එක්ක... ඒ හතිය කොහෙන් ගියාද නෑ අර දැරිවිගේ මුණ දැක්කහම.... හප්පේ බලන්න එපෑයැ... සිරියාව.. පුහ්... ඒ වගේ කෙලි පොඩිත්තියො හරි අඩුවෙන් නෙව බැංකුවකට වුණත් එන්නෙ... ඉතින් අපේ එකා දැන් ෆුල් ට්‍රයි එක කෙල්ලට වචනයක් දාන්න.. පොඩි පනාවක් එහෙම දාලා ඇහැවිවා.. “මොකක්ද මිස් තියෙන්නෙ ?” කියල...කෙල්ලත් ඉතින් හිනාවෙල ඩිපොසිට් ස්ලිප් එකකුයි දාහේ නෝට්ටුවකුයි දික් කළා කියමුකෝ.. දෙන දෙයියො ගෙට ගෙනැවිත් දෙනව කියල කියන්නේ ඔන්න ඕකට තමා... ඒ දැරිවි ඇවිත් තියෙන්නෙ මොබයිල් ෆෝන් බිල් එක ගෙවන්න... ඔය තියෙන්නේ ගෙඩිපිටින් ෆෝන් නොම්මරේ... අපේ එකත් පස්වණක් ප්‍රීතියෙන් පිනා ගිහිල්ලා වවුචර් එක පෝස්ට් කළා කියමුකො... අර කිව්වත් වගේ මිනිහ නෙමෙයි එක විනාඩියකට හරි ඇස් දෙක අහක් කර ගත්තේ අර දැරිවිගේ මූණෙන්.. මු අනිමිසලෝචන පූජාව කරත්දි අර දැරිවිත් ඇඹරෙනවා... ලැජ්ජාවෙන්ද මන්දා... වැඩේ හරි වගේ... දැරිවිත් ඇස් වලින් මොන මොනවාදෝ කියනවා... අපේ හාදයටත් ෆුල් හැපි..... මෑන් පුරුදු විදිහටම වවුචරය පෝස්ට් කරල ඉවර වෙල.. ඔරිජිනල් කොපිය ගලවල අරගෙන ස්පයික් එකේ ගහල.. දාහේ නෝට්ටුව කෑෂ් ඩ්‍රෝවරේට දාලා.... වවුචර කොපිය අර දැරිවිගේ අතට දුන්නා... නිකන් නෙමේ.. ගලවල ගත්තු හදවතත් එක්කම... වවුචර් කොපිය අතට ගන්නවත් එක්කම අර දැරිවිට "බකස්" ගාල හිනා ගියේ නැතෑ.. අපේ එකා ෆුල් හොල්මන්... මෙච්චර වෙල මුකුළු පපා හිටිය ඒ දැරිවිත් අතින් කට තදකරගෙන ඉක්මන් ගමනින් යන්න ගියේ නැතෑ... අපේ කතානායකයා මුකුත් හිතාගන්න බැරුව වට පිට බලනවා... ඔන්න එතකොට තමා අපේ අයියලත් ටිකක් විපරම් ඇහැ දාලා බැලුවේ... හත්තිලව්වයි....! අර “බකස්” එක බෝවෙන රෝගයක් වෙන්ඩ වැඩි වෙලාවක් ගියේ නෑ... අපේ අයියලට උන් හිටි තැනුත් අමතක වෙන්ඩ ඒ ටිකම ඇති....

මාත් ඉතින් මේ කළබගෑනිය මොකක්ද කියල බලන්ඩ පොඩ්ඩක් ඒ පැත්තට ඔලුව දාලා බැලුවා....
ඇන්න.. නේද තාප්පෙටම කිව්වලු...

මේං බොලේ දාහේ නෝට්ටුවක් අපේ හාදයගේ ස්පයික් එකේ.....

| සේයාරූ PicApp අඩවියෙනි |